Dr Klimawandel wietet und in Blatte het me's gsee Dr halbi Bäärg kunnt aabe und's schtöön kaini Hüüser mee In Zuekunft git's das mee und's wäärde nomee Ort verschwinde Nur leider kaa me rund um Züüri z'weenig Bäärge finde
Die Trikots vo letscht Saison, nei, die finde mir nid glatt Mir hätte's gärn modäärner gha, doch mit Bezuug zur Stadt Druffaabe uff die jetzig Saison het dr FCB Für s Usswärtslyybli Goschdyymräschte gnoo vom ESC
D BVB, die isch in Noot und ringt um Personaal Mit Waggelauge und 'me Lied, das finde mir geniaal Und zum kaschiere, dass me glyych no z weenig rekrutiert Hän die alli Demos in dr Stadt organisiert
Mir Schieler saage in dr Schuel gäärn „cringe" oder „sybau" „67" und „das crazy" oder „goone" dien mir au D Eltere sin rootloos und verschtöön drvoo kai Fätze So goots uns Junge, wenn die Alte Baseldytsch dien schwätze
Sit paar Möönet diskutiert me immer wider s Glyyche: Söll me Friehfranzöösisch usem Leerplaan uusestryyche? Doch wenn's das Fach nümm gää sott, denn wird öppis immer klaarer: S'git „Friehfranzöösisch" numme no für kathoolischi Pfaarer
Im Liggstuehl am'ne Strand und 'me Windli in de Hoor In dr Hand e Cocktail und biz Muusig uffem Oor So gmietlig und entspannt bereitet sich und das isch woor E Gooli uff e Sturm vo unsrem FC Basel voor
In Züüri gits ächt alles: starggi Wirtschaft und no mee Designerlääde, d Liechtathleetik-Wältklass und e See Konzäärt uss aller Wält und sogaar e Marathon Und trotzdäm hän die immer no kai Fuessballstadion
S Tourismusbüro Basel macht stargg Wäärbig für die Stadt Und meint, für neui Touris wääri d Fasnacht doch no glatt Vo Franggryych bis uff Ängland het das jeede mitbekoo Und jetzt würd dr Prinz Andrew gäärn an d Kinderfasnacht koo
In dr Garaasch stoot dr Babbe schwitzend voor sym Kaare So vyyl wie äär in Kofferruum macht, muess dää ganz lang faare: E Färnsee, sy Pyjama und dezue sy Necessaire Mir wüsse nid so rächt, wott dä in Schnee oder an s Meer? Debyy het äär sy Winterjagge, Stögg und syni Ski E Surfbrätt, syni Sunnebrülle und drey Kischte Wyy Au Ässe uss dr Doose und e Pagg Schyssipapier Sy Laptop, e baar Windle und denn au no sy Klavier E Kamera, Kondoom, e Massge und e Bolle Stroo D Mamme isch verwirrt und froggt: „Wottsch du uns jetzt verloo?" Doo maint dr Babbe ganz entnäärvt: „Ych kumm jo wider, Schatz Ych sett nur schnäll ins Gschäft und muess halt üb're Aescheplatz"