D Muulwiirf

Dr Ruedi goot uff Raise und zahlt drum e Huffe Gäld. Venedig, Pisa, Eiffelturm, s koscht Yytritt uff dr Wält. Sogar die 5 Stutz z Iseltwald, die gseet är jo no yy. Nur dä Lappe in Birsfälde hät nid miesse syy.

Dr Trump frisst scho zem Zmorge Aspirin, s wird täglig mee, Well, bi somne Kopf duet s dängge an sich jo scho weeh. Me sait, är nähm zuedäm no Abfiehrmittel vorem Pfuuse und spielt eso dur d Nacht dä Infantino wider uuse.

Die neue Abnähmsprütze wirke bi de Maischte guet. Dr Saich isch nur, s wird tüür wenn Kasse die nit zahle duet. In däm Fall könntsch au grad so guet ins neu Drey Keenig go, Well dört hesch au nit gässe und dr Zahldaag duuregloo.

Z Basel wird Verkehrsberuhigig gförderet und gläbt, Als Konsequänz gits Megastaus, me nennts Verkehrskonzäpt, S Prinzip isch gar nid neu, speziell als Maa, kennt me s jo gnau: Wenn Rueh isch bim Verkehr, isch in dr Hose halt e Stau !

D Innerstadt wird trämmlifrei, für Vyyli wärs s e Schogg drfür wirds ruhig und nätt und grien, wie im ne Superblock, Wär bruucht scho Trämli in dr Stadt, das wär jo unerhört, die hän 400 Mol pro Joor bi Demos numme gstöört.

S Konzept vom Basler Superblogg wird schwyyzwit präsentiert. Doch das Gschyss um Rueh het schyyns dr Landroot irritiert: «Was die dört z Basel möche, das hai mir bi eus scho lang, nur haisst s nid Superblogg und goot vo Buus bis zum Passwang.»

Öschtryych gwünnt dr ESC, mit Sturm und hohem C. Für Switzerland gits Zero Points, gwünscht hät sich d Zoe Mee. Mir möge s ihne gönne, s git kai Grund zem nidisch syy, Die mien im Summer gwünne, well im Winter lauft jo Ski !

Bi däre SRG Halbierig, Jä de wirdsch es gseh, Halbiert sich denn au d Quantität vom Programm grad per se…..

Mer hän ys gfrogt, um was es bi dr Hüürotsstroof gnau goot. Und frooge Prominänti, worin d Stroof denn gnau bestoot. Es syg scho schlimm, s duet all Daag weh, in sym Fall ganz speziell, Sait dr Herr Martullo-Blocher und är maints nid finanziell.